Дзень каваля в музее, 0+

Дзень каваля
«Каваль куе – жалеза пяе»

Дзень святых Касьмы і Дзям’яна — свята кавалёў. Менавіта гэтыя хрысціянскія святыя лічацца апекунамі земляробства і кавальства на Беларусі. Бытавала павер’е, што яны з’яўляюцца сімвалічнымі “Божымі кавалямі”, якія з нябёсаў дапамагалі з металічнымі прыладамі працы — адбівалі і тачылі косы, сачылі за вастратой сякераў на сялянскім двары.

Унясенне свята кавалёў у народны каляндар сведчыць аб вялікай павазе да майстроў, якія займаліся апрацоўкай металу. Кавальская справа – гэта адно са старажытнейшых рамёстваў, вядомых чалавецтву. Стаць кавалём не так проста, бо навучанне гэтаму майстэрству працягвалася ад 3 да 7 гадоў.

Будынак кузні ў традыцыйнай беларускай вёсцы стаяў на ўскрайку, пры дарозе. Навокал яго заўсёды быў чуваць грукат кавадлы і лязгат металу – менавіта там нараджаліся неабходныя ў сялянскім побыце вырабы: падковы, сярпы, нажы, сякеры і малаткі. З глыбокай павагай адносіліся да каваля людзі, лічылі яго волатам, у якога рукі ў золаце. Пра кавалёў у народзе казалі так: “У каваля што не стук – то грыўня”. Але пры гэтым да кавалёў ставіліся з пэўнай асцярогай, бо меркавалі, што яны з нячыстай сілай водзяцца!

Каб падрабязней даведацца пра майстэрства кавалёў і іх святых апякуноў, Касьму і Дзям’яна, запрашаем Вас наведаць Беларускі дзяржаўны музей народнай архітэктуры і побыту!

Вас чакае:

• Расповед пра кавальства на Беларусі;
• Майстар-клас па кавальству.