Купалле – адно з самых містычных і яркіх старажытных свят, якое сімвалізуе пік лета, найвышэйшы росквіт зямлі і магію сонечнага святла. У гэты дзень прырода дасягае сваёй моцы, а межы паміж рэальным і чароўным становяцца тонкімі. Мы запрашаем вас акунуцца ў сапраўдную атмасферу традыцыйнага вясковага гуляння, дзе сучасныя музычныя рытмы пераплятаюцца з абрадамі нашых продкаў.
Што чакае гасцей на свяце:
- Пляценне вянкоў. З самага пачатку вы зможаце далучыцца да стварэння галоўнага купальскага амулета. У вянок прынята ўплятаць палявыя травы і кветкі, каб прыцягнуць шчасце, здароўе ці даведацца пра лёс.
- Купальскае шэсце з традыцыйнымі песнямі. Завяршальным этапам падрыхтоўкі стане агульнае шэсце да галоўнага вогнішча. Пад аўтэнтычныя абрадавыя спевы, якія заклікаюць сонца і ваду, удзельнікі пранясуць уласнаруч зробленыя вянкі, ствараючы жывую музычную працэсію.
- Вогнішча: карагоды, гульні, скокі. Купальскае вогнішча ў выглядзе 7-мятровай драўлянай фігуры – гэта сэрца свята. Яно ачышчае агнём і дае новыя сілы. Тут будуць вадзіць гіганцкія карагоды, гуляць у старажытныя забавы, а найсмелейшыя змогуць праверыць свой лёс, пераскочыўшы праз полымя.
- Варожбы. Гэты дзень лічыцца самым моцным для прадказанняў, таму варта скарыстацца момантам.
- Майстар-класы. Для тых, хто хоча не толькі глядзець, але і вучыцца, прапануюцца заняткі:
- па вывучэнні сапраўдных купальскіх песень;
- па традыцыйных танцах пад беларускія народныя інструменты (цымбалы, скрыпка, дуда);
- па стварэнні дэкору з жывой травы;
- па вырабу абярэгаў – лялек з травы.
- Выступленні фальклорных калектываў. На працягу вечара на галоўнай сцэне будуць гучаць сапраўдныя народныя спевы і інструментальная музыка ў выкананні лепшых калектываў краіны.
- Канцэртная праграма. Драйвовыя выступленні сучасных гуртоў, якія гарманічна ўплятаюць этніку ў рок і поп-культуру: перад вамі выступяць «KAS», «Вока Чарота», І.І.Кірчук, «Дабранач».
Кульмінацыяй вечара стане захапляльнае прафесійнае шоу з агнём, якое ператворыць ноч у незабыўнае відовішча.
- Дзіцячая зона. Для маленькіх гасцей будзе працаваць асобная пляцоўка з бяспечнымі гульнямі, майстар-класамі і забавамі, каб яны таксама адчулі чараўніцтва Купалля.
- Тысячны карагод. У фінале мы аб’яднаем усіх удзельнікаў у адным вялікім карагоду вакол вогнішча – сімвале яднання, святла і радасці.
Дадатковыя магчымасці (за асобную плату):
- Сувеніры ад народных майстроў: тут можна будзе набыць унікальныя вырабы з саломкі, дрэва, гліны і тканіны, якія захоўваюць цяпло рук майстра.
- Беларуская карчма. Смачна паесці і асвяжыцца прапануе сапраўдная карчма, размешчаная на тэрыторыі музея. У меню – стравы беларускай кухні, прыгатаваныя па старажытных рэцэптах.
